Ua faaopoopo e se tasi o polokalame oloo unaia fanau aoga i mataupu tau Saienisi poo le Nofouta Mentoring Program le faaaogaina ai o auala o faamatalaga ma fesootaiga faatekonolosi ina mafai lea ona mataitu e fanau aoga filifiliga o galuega e talafeauga mo i latou.

O lenei polokalame o loo taitaiina e se tasi o tamalii sa avea ma Pule Sili o le Matagaluega o Fesootaiga ma Faamatalaga faatekonolosi Fualau Talatalaga Mata’u Matafeo na ia faapupula ai le autu o lenei polokalame mo fanau aoga.

“Faafetai i le polokalame a le Malo tele o Amerika i ana fesoasoani tupe mo le amanaia o lenei taumafaiga e ala lea i le unaia o fanau aoga i mataupu faasaienisi ma le faatekonolosi auā a oo ina manuia laasaga o aoaoga o loo mafai ona saili galuega e fetaui iai polokalame nei poo mataupu o loo ave iai le auaunaga a le Nofouta.”

E $15,000 le seleni na faamatuu atu mai le Malo tele o Amerika e agai lea i polokalame a le Nofouta mo fanau aoga i le Vasega 12 ma le 13.

Na ta’ua e Noriko Horiuchi o le Sui o le Malo o Amerika i Samoa nei o le puipuiga o faamatalaga ma fesootaiga faatekonolosi o le tasi lea o vaega tāua i ona po nei.

“O le faigapaaga ma le polokalame a le Nofouta Mentoring o loo galulue ai e tuuina atu mea o loo moomia e alo ma fanau o patino ai lenei faamoemoe auā le faalauaitele o tomai mo se lumanai manuia.

“O loo maitauina e le Malo o Amerika tulaga manaomia o tomai faapitoa i le vaega tau tekonolosi ma e ao ina fesoasoani ia tino mai lenei manaoga.

“O le ta’ua o lenei polokalame ma le faalauiloaina o vaega tau tekonolosi o le a maua ai avanoa mo alo ma fanau a Samoa e fefaasoaa’i ai ma i latou o loo faia lenei polokalame e aotauina ai i vaega eseese.”

Na faamanuiaina ai fanau o loo auai i lenei polokalame i Chromebooks auā le amatalia ai o lenei faamoemoe.