Na faaaogā sese e le matagaluega o tagata Pasefika tupe a tagata totogi lafoga.
O saunoaga nei a le komesina o galuega a le malo Peter Hughes e tusa ma le faamavaega taugata e lata i le $40,000 na faamavae ai le matagaluega ma lē sa avea ma Pule Sili, Leauanae Laulu Mac Leauanae.
E $39,262.22 lea na faaalu e le matagaluega o tagata Pasefika e totogi mo le faamavaega, ma e aofia ai le meaalofa $7500 mo Leauanae, $3000 mo ata faapea fugalaau, e ese ai le lata i le $5000 na faaalu mo feoaiga mo le tagata faigaluega e toatasi, o malo faaaloalogia faapea ai ma le toaono tagata o le aiga o lē sa Pule Sili.
I lipoti e faapea, e ui e lei auai Leauanae i tapenaga o le faamavaega ae o lea na toe totogi e Leauanae le $4,115.38 e totogi ai tupe na faaalu mo feoaiga a malo faapea tagata o lona aiga, e ese ai le $7,500 o meaalofa ma ua toe faafoi uma foi meaalofa.
I iloiloga a le komisi ua maua ai ua soli e lea faamavaega taiala a le matagaluega e ala lea i ana tupe faaalu, aemaise o le taiala a le komisi.
Ua toe faamanatu ai e le komesina le faamoemoega o le malo aemaise o tagata totogi lafoga a Niu Sila ia faaaogā tatau tupe, ma e mafai lava foi ona faia faamavaega faaleaganuu ae ia faia i totonu o taiala ua faataatia.
Na ta’ua e le taitai o le ACT, David Seymour o lona manaoga ia aua ne’i toe iai se matagaluega o tagata Pasefika peitai e ono faigata ona taunuu ona e le o lagolagoina e le National.
E ui o loo tumau pea le talitonuga o le minisita o tagata Pasefika, Barbara Edmonds i le pulega fou ua iai nei, ae ua ia faaalia lona faanoanoa i le mea ua tupu.
