I le tuanai o le iva tausaga talu ona tapunia ua lē toe faaaogāina le falemai tuma’oti o le Medcen i Vailima, ma taumafai ai le pulegamalo sa iai e faatau le falemai mo se isi auaunaga tau soifua maloloina, o le tausaga na tea nei ina ua pale atu le faigamalo ua iai nei a le Faatuatua i le Atua Samoa ua Tasi, na faia ai le faaiuga a le Kapeneta e tuuina atu fale uma sa iai le falemai i le pulega o le nofoaga mo suesuega faasaienisi o loo i Nafanua, latou te faaaogā mo a latou suesuega.
O le asiasiga a le komiti a le Kapeneta i le vaiaso na tea nei na afea ai le nofoaga ma faailoa ai e se sui ofisa sili o le pulega o le nofoaga o suesuega faasaienisi le mae’a ai ona tapena le nofoaga mo suesuega faasaienisi i le aoga o laau eseese faapea suesuega i faamai o meaola ma manu aemaise o suesuega mo soo se pauta, o laau ma fualaau faasāina.
O le asiasiga a le komiti a le Kapeneta na afea ai foi nisi o galuega o loo faagasolo e pei o le nofoaga i Tuanaimato ua faatuina ai le pamu penisini fou a le Malo mo le utuina o taavale a le Malo.
O lea galuega e pei ona faailoa i upega tafailagi o auala o faasalalauga a le Malo, o loo fuafua mo le taligamalo a le atunuu i le fono a Malo o le Taupulega i le tausaga fou.
O le uafu i Mulifanua na afea foi e le asiasiga ma molimauina ai se tasi o galuega ua faatino i fale faatali pasese o le toe iai o nofoa fou ma se televise mo le mamalu o le atunuu e malaga i Salafai.
