Ua faaaogā nei i se faiga taufaavalea ma taufaasese e ala i fesoota’iga ma faasalalauga i luga o fesoota’iga faaonaponei le social media, le suafa o le sui faipule o le itumalo palota o Vaimauga 4 le afioga i le Minisita o le Matāgaluega o Leoleo, Falepuipui ma le Toefuata’ina, le afioga Faualo Harry Jeffrey Schuster, i se su’egatupe mo faatosina o le palota.
E iai le talitonuga e matuā leai se silafia o le sui faipule o lea itumalo i ia faasalalauga ma e lē o iai foi ni ana su’egatupe o faia.
O luga o le api o foliga le facebook o loo salalau ai lea faasalalauga, peitai ua aumai i le itulau o fesoota’iga a le faigamalo o tu nei i le foe se lapata’iga i le atunuu ma faailoa ai e sese ia faasalalauga.
O nai vaiaso e le’i mamao atu sa molimauina ai ia faasalalauga taufaavalea ma taufaasese ae o ni gaioiga e lē o iloa poo ai o lalafi mai ai i tua.
