O le faiga o loo faaaoga i le taimi nei e le Faletupe Tutotonu e faamamā pe kilia ai tupe e fia ave i fafo mo gaioiga faapisinisi e pei o le okaina o oloa, e tuai ma tele le lavelave, ae o se faiga fou o le a faaaoga e le faletupe tutotonu o Samoa o le a saogalemu, ma vave ai ona faamatuu atu tupe mo ia gaioiga faapisinisi.

Ua faailoa e le tamaitai Kovana o le faauluuluga o le Faletupe Tutotonu o le atunuu le afioga Maiava Atalina Emma Ainuu Enari, o le faiga fou ua ta’ua o le Samoa Automated Transfer System poo le SATS, o le a sili atu ona lelei ma malupuipuia mo galuega i le feaveaiina o tupe mai auaunaga a faletupe faapisinisi i le atunuu poo commercial banks.

O se faiga o le a malupuipuia ai le teuina ma le feaveaiina o seleni e le gata mo tagata ma pisinisi o loo faia teugatupe i faletupe, ae faapea foi mo ē e leai ni teugatupe poo ni bank accounts.

Ua faaalia e le pulega o le faletupe tutotonu a Samoa o lenei suiga fou ua faatino i atunuu e pei o Fiti ma Papua Niu Kini.

O le fesoasoani a le Malo o Niu Sila ma Ausetalia na auina mai ai ni tagata popoto aoaoina e fesoasoani i le faletupe tutotonu o Samoa i le faatuina o lea faiga fou.

Ua faailoa ai e le Kovana o le faletupe tutotonu o le a le toe iai ni lavelave ma ni faafitauli e tulai mai ai ae o le a vave ai foi ona maua faaiuga mo le faamatuuina o tupe mo galuega faapisinisi i atunuu i fafo.

O le Faletupe o le lalolagi ma le auaunaga e ta’ua o le IFC poo le International Financial Cooperation sa fesoasoani foi i le Faletupe tutotonu o Samoa i lea taumafaiga.