O le kamupani a le Pure Athletic mai Niu Sila o se tasi lea o kamupani o loo gaosia togiga mai fagu uga(plastic)a au alovaa a nisi o atunuu o loo auai i le Tuuga vaa a le Lalolagi lea o loo faia i Samoa nei.
Na ta’ua e le Pule Faatonu a lenei kamupani Chris McKinley le faaaogāina o fagu uga e gaosia ai le ituaiga ofu lea o loo faaaogāina e atunuu e aofia ai ma Samoa.
“E 8 fagu uga e maua ai le ofu e tasi ma sa gaosia uma mai le matou fale gaosi i Saina.
“E aoina mai fagu uga, ona recycle lea ina ia mafai ai ona gaosia togiga a ‘au alovaa a atunuu o loo faaaogāina i tuuga i le asō e pei o le ‘au a Samoa, Cook Island, Ausetalia ma Niu Sila.
“O le ono masina talu ai na matou amata ai ae o loo ua vaaia le tulaga manuia o lenei foi poloketi.”
E 3000 ofu o loo faatauina e lenei kamupani i le nofoaga autu o lenei faamoemoe ma na vaaia le lolofi ai o le toatele o tagata e faatau ai.
“E tele se tupe sa faaalu i le gaosiaina o nei ofu ae o le sao foi lea i le puipuia o le siosiomaga mai le tele o fagu uga aemaise ai o le gataifale.”
O le naunautaiga o le kamupani ia le gata ai i le gaosia o oloa e faaaogā ai fagu uga e fesoasoani i le tamaoaiga i le pisinisi ae o le puipuia ai o le siosiomaga.
O le aso muamua lenei o tuuga vaaalo a le lalolagi lea o loo faatautaia i le talafatai i Apia.
