Ua vāvāō le lalolagi i gaioiga a Amerika na faatino ina ua faatonuina e le alii Peresitene Donald Trump, lana vaega ‘au o le militeri e osofa’i le atunuu o Venezuela i le faaiuga o le vaiaso talu ai, ae ave faapagota le peresitene o lea malo ia Nicolás Maduro ma lona toalua ia Cilia Flores; faamauina lo lā aafia ai ini mataupu faasolitualafono e fesoota’i lea i fualaau faasāina, o loo avatu i totonu o Amerika.
Ae i le tula’i mai o lenei mataupu, o lea ua fa’aali manatu a Niu Sila e tusa ai ma gaioiga na faatino e le malo tele o Amerika.
I se ripoti mai le leitio faavaomalo a Niu Sila, na tuu mai ai se finagalo a le alii Minisita o le Va i Fafo, Vaovasamania Winston Peters; na ia fa’alia ai popolega o Niu Sila i ia osofa’iga.
Manatu Peters e tatau lava i soo se malo ona usita’ia aiaiga ma faavae o atunuu faavaomalo. Faaopoopo le Minisita, o loo iai le lagolago a Niu Sila mo tagatanuu o Venezuela, ma ona o le ma’ale’ale tele o lenei mataupu, o lea ua fautuaina e Vaovasamanaia tagatanuu Niu Sila o loo fuafua e malaga i lea atunuu ina ia tolopo pe taofi le malaga, a o taumafai lea malo e fetuuna’i tulaga ua iai nei ona o lenei faafitauli.
Faaalia le tālia ai o se faamatalaga i se fonotaga faatopetope a malo aufaatasi e talanoaina ai lenei mataupu.
Puna o Faamatalaga: https://www.rnz.co.nz/news/political/583129/venezuela-attack-new-zealand-concerned-expects-everyone-to-follow-international-law-winston-peters
