O se vaega malūlū o le tau ua pa’ū ai le kiona poo le snow i le itu i sisifo o Europa, ma ua telē sona aafiaga i feoa’iga a tagata.
Fai mai le BBC e faitau selau faigamalaga i va’alele ua faalēaogaina ma toe fetu’una’i, o le malae va’alele i Amsterdam e oo i le 700 faigamalaga na faalēaogaina ae ua logo ane foi e le vaega o femalagaa’iga i Farani i kamupani va’alele ina ia faaitiitia i le 40 pasene le aofa’i o faigamalaga e faataunu’u atu i le malae va’alele autū i Pale i Farani poo Paris.
A itiiti mai pe to’aono tagata ua maliliu ona o aafiaga o lea tau malūlū, to’alima mai Farani ma le to’atasi mai Bosnia.
Molimau le tele o turisi e masani ona āsia le laumua o Farani e le masani ai i le va’aiga o loo iai i le taimi nei i le mamafa o le kiona ma e toatele o loo fiafia ai aemaise i latou e fiafia e faase’e.
Ta’ua e le vaaitau o loo faasolo ina faateteleina le malosi o le ‘aisa e toulu, o se tulaga e ofo ai le toatele ona i le isi itu o le lalolagi e pei o le Pasefika i le taimi nei o loo matua’i faalogoina ai le malosi o le vevela.
Puna o le Faamatalaga: https://www.bbc.com/news/articles/cy59k13e7eqo
