E eseese vaai a le fomai faapitoa mai Fiti lea na oo mai i le vaiaso ua tuanai e faia taotoga o tino maliu sa taooto ai i le falemai ma le vaavaai a fomai faapitoa a Saina lea na omai muamua i le nofoaga na lavea ma ma’umau ai le soifua o le talavou ia Tuuau Fasavalu.
Na ta’ua e le alii Komesina o Leoleo ia Auapaau Logoitino Filipo sa oo atu foi le fomai mai Fiti lea na sau e tilotilo i le vaega tonu na tupu ai le faalavelave ma i lana talanoa atu, na pau le itu o loo ia faamaonia o lē ua maliu na lavea i le taavale ae eseese itu na lavea ai ma le itu o loo molimau ai foi suesuega a fomai faapitoa mai Saina na oo mai talu ai.
Ua faailoa e Auapaau, na pau lea o le tulaga o loo latou maitauina i suesuega sa faia ma le oo mai o fomai faapitoa ma ua toe foi atu nei le fomai i Fiti ae o le a tālia lana ripoti e tusa ai o lana foi tilotilo i le vaega na tupu ai le faalavelave.
