O faasalalauga tuusa’o o le sauniga na faatauto ai ta’ita’i o le faigamalo fou a Amerika Samoa, na molimauina ai le mauaa pea o sootaga o Samoa e ui ina ua eseese faigaupufai o malo.
O le ulua’i saunoaga a le Kovana Sili le afioga Pulaalii Nikolao Pula sa ia faafetaia ai le tali faaaloalo o le Malo o Samoa Tutoatasi i le auai atu o le ta’ita’i o le Malo i le tamaitai Palemia, ae sa auai foi nisi o sui faipule o le Palemene o Samoa e aofia ai ma le ta’ita’i o le Itu Agai.
E lē gata sa faafetai le Kovana Sili i le auai o sui o le tatou Malo, ae sa faafetai foi le Lutena Kovana le afioga Pulumataala Ae Ae Jr lea sa ia momoli foi ona alofa’aga i le Ao o le Malo e tauala atu i le tamaitai Palemia le Afioga Fiame Dr Naomi Mataafa.
O se vaega o le saunoaga a le Kovana Sili o Amerika Samoa le afioga Pulaalii Nikolao Pula i le sauniga na faatauto ai ta’ita’i filifilia o le faigamalo a Amerika Samoa, e pei ona sa auai ma le ta’ita’i o le Malo Tutoatasi o Samoa.
