E iai moliaga e ono molia ai le avepasi a le Manuia i le Alofa ona o se faalavelave na tulai mai i le vaiaso nei lea na manunu’a ai le pasese.

O loo faagasolo pea suesuega a le Matagaluega o Leoleo i le faalavelave lea na tulai mai i se pasi na malaga atu i Apia mo tuā ae lavea ai i le va o Matatufu ma Lotofaga.

Faaalia e le sui komesina o Papalii Monalisa Tia’i Keti, pau le tulaga na faafetai ai ona e lei iai se soifua na ma’umau.

I lipoti a leoleo na auina atu le pasese o talavou ma nai tamā ma tina matutua i le falemai faaitumalo i Lalomanu ma na mae’a lava togafitiga ma agai atu ai lava i o latou aiga.

Faaalia e Papalii sa agai atu nisi o le Matagaluega e faatino suesuega i le pasi pe o iai se mea o faaletonu ma na faamauina o loo lelei atoatoa le pasi.