O le mae’a faamaonia e le Kapeneta i le vaiaso na tea nei, o le filifilia o le susuga Papalii John Taimalelagi Afele, e avea ma Ofisa Sili o le pulega o le matagaluega o faamasinoga ma le faafoeina o mataupu tau faamasinoga mo le 3 tausaga, ua faailoa e le Minisita o lea matagaluega i se lomiga a le nusipepa o le Samoa Observer, e lei talia e le Kapeneta le fautuaga a le komisi o galuega a le Malo ina ia toe tofia lē sa faauluulu iai lea matagaluega le faletua o Moliei Simi Vaai.
I se finagalo o le tamaitai Minisita o Faamasinoga le tofa Matamua Vasati Sili Pulufana, i le lipoti a le nusipepa o loo ia ta’ua ai, na tuuina atu le fautuaga ae na autasi le Kapeneta e filifilia Papalii, o se tasi sa toe talosaga i le avanoa sa ia tauaveina muamua a o lei faamuta i le tausaga e 2019 lona tofiga e le Kapeneta sa iai a le faigamalo i lea vaitaimi.
Ua faailoa ai foi e le minisita o mafuaaga na faamuta ai e le Kapeneta i lea vaitau le tofiga Ofisa Sili o Papalii ma le toe talia e le komisi o galuega a le Malo o le toe talosaga atu i le avanoa, o le faaiuga tutasi lea a le komisi poo le PSC.
O se talanoaga ma le susuga Papalii John Taimalelagi Afele i le vaega tonu lea, na ia faailoa mai ai e lei fesiligia o ia i le faatalanoaga i le faamutaina e le Kapeneta i le tausaga e 2019 o lona avea ai ma Ofisa Sili.
O le finagalo lena o Papalii ina ua fesiligia e a tatou tala mai Samoa i le Aso Tofi na tea nei.
