O le faaiuga a atunuu o sui o Malo Aufaatasi ina ia taofia le taua a Isaraelu ma le vaega fouvale a Palesitina le Hamas, ona ua ogaoga aafiaga o tagata lautele o Palesitina, e lei faia iai se leo o Samoa.

I se isi faaupuga e lei palota Samoa i le faaiuga a le fono aoao a Malo Aufaatasi le United Nations General Assembly lea na lagolagoina e atunuu e 121.

E toa 44 atunuu sa taofi le faia o se latou filifiliga pe abstain, ae ono atunuu e aofia ai ma Samoa e lei palota.

Faaalia i se lipoti mai Malo Aufaatasi e lua atunuu o le Pasefika na palota lagolago i le faaiuga e taofia le taua, o Solomona ma Niu Sila ae ono atunuu o le Pasefika na aofia i le 14 o atunuu na palota tetee.

O atunuu o lenei faaitulagi na latou teena le faaiuga a Malo Aufaatasi o Fiti, le Atu Malesala, Maikoronisia, Nauru, Papua Niu Kini ma Tonga.

O Samoa o se paaga totino a le Malo o Isaraelu e pei ona faamautu ona sootaga faavaomalo ma ua aofia foi lo tatou atunuu i se faaiuga a lea malo e ulufale atu o tatou tagatanuu e aunoa ma ni visa.

O taimi amata o le taua na aveesea ai o tatou tagata mai Isaraelu ma o le toatele lava o i latou na fetaui le malaga ma le taua, sa agai i lea atunuu o Sasae Tutotonu i mafutaga faalelotu.