Ua faailoa mai e le alii Komesina o Leoleo, Auapaau Logoitino Filipo e faapea e oo atu leoleo e faatino a latou suesuega i le Uafu i Matautu i pusaoloa ia sa toesea mai ai i’a sa tuu aisa ai mo le auina atu i fafo e le o ola meapueata poo security cameras a le Uafu, ma o se tulaga faigata lea i le galuega o loo taumafai nei.
O le mataupu lenei sa tuuina mai ai se pepa o faamatalaga mai le Pulega o Uafu ma Taulaga i le taimi na alia’e mai ai lea faafitauli e faapea ua faamalolo lē tumau ni leoleopo e toasefuluono, a o faagasolo ai suesuega i le toesea ai o ia oloa mai pusa sa teu malu ai.
E lei mae’a la suesuega a leoleo i lea mataupu lea o loo masalomia o oloa ua toesea na gaoia mai pusa nei, ma o loo masalomia e le o se taimi puupuu pe na o ni nai aso na faia ai nei tulaga faasolitulafono, e foliga mai o se masaniga faasolitulafono ua leva ona faatino, peitai o lea faatoa maua ina ua lipotia mai i le tusa ma le tolu vaiaso talu ai.
O le taimi nei la e lei molia lava se tasi i lea mataupu, ma ua faailoa foi e le alii Komesina o loo faagasolo galuega a leoleo i faamatalaga a tagata sa faigaluega ai i le uafu i lea taimi.
