O se fuafuaga a le Malo o Ausetalia mo taitoalua ma fanau o nisi o tagata faigaluega faavaitaimi e malaga ma mau faatasi i lea atunuu i ni aiaiga tau tulafono o femalagaa’iga a lea Malo, e lei mautu.
O le fesootaiga faaonapo nei i le api o foliga a le matagaluega o Pisinisi Alamanuia ma Leipa, o loo tali ai ni fesili mai tagata faigaluega faavaitaimi a le atunuu e faatatau i lea mataupu.
O le fesili o loo iai, pe ua mafai ona talosaga i visa e avatu ai o latou toalua ma fanau.
O le tali e lei mautu lea fuafuaga.
O loo iai nisi o manaoga ua mae’a tuuina atu e le ofisa i paaga totino i Ausetalia i le faaleleia ma le agai i luma o le polokalame ae ina ne’i vavevave e avatu taitoalua ma fanau ae e lei mae’a tapena le saogalemu o le lotoifale o ē o galulue faavaitaimi.
Ua faamanino foi i tali agai i lea fesili, le tulaga o nisi o tagata ua tuua galuega ma ua talosaga i le visa ua ta’ua o le Protection Visa e maua ai le nofomau.
O lea visa e mo tagata sulufai mai atunuu o loo vesia i taua ma isi mau faafitauli e lamatia ai le saogalemu o tagata, pau ia o i latou e agavaa iai i le visa lea, i Ausetalia ae mo tagata faigaluega faavaitaimi mai Samoa o le fautuaga ua ave iai, onosai i aiaiga o visa o galuega na malaga ai ona e leai ni taua o tutupu i Samoa.
