Na toe foi Posie Parker i le po o le Aso Toonai ma e lei manuia lana malaga mamao mai i Niu Sila a o iai i lana malaga taamilo – Let Women Speak.

Sa lipotia e le Herald le fefe o le tina Peretania i uiga faaalia ma sosi na faapasī atu i ona foliga e se tasi e lei fiafia i lana mau o loo tu malosi ai e lagolago aiātatau a tina ma tamaitai ae tetee atu i faafafine.

E toatele atu i latou na o ane e faafetaia’i le kulupu o tagata o loo lagolagoina Posie Parker, ma e lei lagona se tala a le tina Peretania i le leotetele ma le pisapisao o tagata e lei taliaina le oo mai o Posie Parker.

Na toe vave aveesea mai e le taavale leoleo Parker, mamulimuli ane ai vaaia i le malaevaalele i le po o le Aso Toonai ua toe tuuvaa ese atu ma Niu Sila.

O lona toe vave foi na le taunuu ai ma le isi ana tautalaga faalauaitele na tuu e faia ananafi i Ueligitone, ma e ui la e lei taunuu ae o lea na faaaoga pea e i latou o loo lagolagoina faafafine e fiafia faatasi ai i Ueligitone faapea Kalaiesetete.

Ua tuuaia ai e nisi e lei lava puipuiga a leoleo i le Aso Toonai.

Ae fai mai Posie Parker i luga o le Twitter, mai atunuu uma ua ia asia, o Niu Sila le atunuu aupito i sili lea ona lē lelei mo tina.

Ae mo lē na ia faapasīa le fagu sosi i foliga o Posie Parker, Eli Rubashkyn, fai mai a ia, e tusa lava pe ave ia i le falepuipui ua matuai fiafia i lana mea sa fai ma o loo tapena foi i le taimi e valaau atu ai leoleo.