Saunoa le tamaitai sui komesina, Papalii Monalisa Tia’i Keti, e lei logoina leoleo i le maliu o le teineitiiti aoga lea mai le Kolisi o Uesele, lea na tulai mai i le vaiaso na tea nei.
O loo ua amata ai nei suesuega a leoleo i le maliu o lenei teineitiiti aoga, lea e faapea faamatalaga na see lea teine aoga ma sasa lona ulu i lalo ma auina atu ai loa i le falemai.
Na faamaonia mai e le tamaitai sui Komesina ia Papalii Monalisa Tia’i Keti i le afiafi ananafi o loo ua faatoa agai leoleo e faagasolo a latou galuega i le mataupu ona na faailoa mai e lei lipotia atu i leoleo lea mataupu.
Ae o le afiafi ananafi ina ua tuuina atu fesili mai a tatou tala na agai atu ai loa leoleo i le Falemai ma maua ai, na maliu lea teine aoga ma saini ai e le fomai sa ia vaaia le pepa maliu ae lei logoina le pule o maliu poo le coroner.
Ua faailoa e le tamaitai sui Komesina e tatau ona silafia e le pule o maliu le faalavelave ona e lē o se ma’i poo se tulaga faalenatura na maliu ai le teine aoga.
