Ua faamatala e se tasi tina e suafa ia Anne Maree Thomas i le aufaasalalau lona faanoanoa tele i le leai o se gaioiga poo se faatatau foi e faia i sui o kegi a le Mongrel Mob sa feofeoai solo i totonu o le vaega o potu tigaina i le falemai i Kalaiesetete e aunoa ma le faia o ni talifofoga poo masks.
O lea tina o loo taofia ai si ana tama talavou e aafia i le kanesa i le falemai lea ma o lona manatu ua leai lava se isi o le aufaigaluega a le falemai sei faatonu ane sui o kegi ia ina ia faia talifofoga i totonu o le falemai ae o loo iai faiga faavae a le falemai e manaomia ai ona faia e tagata uma e asiasi atu i le maota gasegase, se talifofoga.
Fai mai lea tina e le o le faafitauli le iai o sui o lea kegi i le falemai, ae o le faafitauli o le lē faia o ni talifofoga, fai mai sa ia vili i le pulega a le falemai, faapea foi leoleo ma sikulati ae lei iai lava se gaioiga na faia.
O le faaiuga o le lipoti ua ta’ua ai se faamatalaga mai le Te Whatu Ora Waitaha e faapea sa faamanatu e le aufaigaluega i tagata asiasi ia ina ia faia talifofoga ae ua faamaonia mai e leoleo e lei iai ni malu o le malo na agai ane i le falemai lea ona o lea mataupu.
E manatu le tina o Anne Maree e matuai ono afaina ai si ana tama aemaise foi o isi gasegase i le tulaga lea o le lē faia o ni talifofoga aemaise o loo faaauau pea ona iai le koviti i le atunuu.
