Ua uma ona fau le auala laupapa le tumau e sui ai le auala laupapa i Mill Flat Road i Riverhead i Aukilani lea na ave uma e lologa.
O timuga mamafa ma lologa na iai Aukilani i le aso 27 o Ianuari na tafiesea uma ai ma le auala laupapa, ma o lea na momotu ese atu ai ma le tusa ma le 200 tagata e aumau i le isi itu.
O le tala fiafia e na o le 6 aso na toe fau ai le isi auala laupapa, Bailey Bridge a o lea ua tatala e ui ua na o se auala le tumau.
Ua faafetaia ai e tagata o Mill Flat Road pulega e tolu na tutu faatasi ina ia vave ona maua se tali mo feoaiga a tagata o loo aafia, ma o pulega nei a le Auckland Transport, Downer NZ ma le Waka Kotahi.
E silia ma le 35 tagata faigaluega na toe fauina le auala laupapa le tumau ua iai nei, ma o le faatotogaina o lenei auala laupapa 80 tone na aumai uma mai Hawkes Bay.
I se tala lata mai mai le Auckland Transport e silia ma le 84 auala o Aukilani na tapunia i totonu o le 10 aso ua tuanai e mafua mai i palapala solo ma lologa, peitai e oo mai i le taimi na tuufaatasia ai tala o le taeao ua toe 24 auala o loo tapunia pea ma o loo galulue ai le faitau selau o le aufaigaluega ina ia vave ona toe tatala.
