Na manino i le saunoaga a le afioga i le Minisita o Faatoaga ma Faigafaiva, Laaulialemalietoa Leuatea Polataivao Fosi Schmidt, i lana faatalanoaga i luga o le Radio Samoa, e mafai ona faatuina se maketi o faafefaataua’iga i Samoa, ae i le taimi nei e lei iai se feagaiga mautinoa ua sainia.
Saunoa Laauli, e le o se mea fou le faatalanoaina o lea mataupu, ma o le mataupu lenei i faiga pisinisi ia e ta’ua o stock exchange, cryptocurrency, economical zone, ma vaalele ia na alu atu ai le direct flight i Samoa, o kamupani tuma’oti, e le o ni kamupani e aafia ai le va o malo i le malo.
O kamupani nei, saunoa Laauli, ua ova ma le sefulu tausaga o fai a latou faigapaaga ma lona itumalo, ma o loo iai foi latou sainiga feagaiga o loo lisi atu ai nisi o fanua o lona itumalo mo ni fuafuaga a lenei kamupani, lea e totogi mai ai lava le $250 afe tala i le tausaga mo lea lisi e oo mai le taimi nei.
Ua leva tele la le latou faigapaaga, ma o loo naunau pisinisi nei e fia oatu e faatu a latou pisinisi i Samoa ma avea ai Samoa ma taulaiga o le fefaatauaiga o tupe (financial hub) i totonu o le Vasa Pasefika, ona o le umi lea na latou faipaaga ai ma agai atu foi i Samoa e silasila i le tulaga o loo iai le atunuu, ma ua latou mautinoa ai, e saogalemu le faatuina ai o latou pisinisi nei i Samoa.
O kamupani e pei ona saunoa Laauli, afai ae oo ona faatuina a latou pisinisi i Samoa, e telē le fesoasoani i le tamaoaiga o Samoa, e ala ia latou faiga pisinisi auā o le a agai uma atu i ai nisi pisinisi e totogi laisene ma isi uma vaega e maua ai e Samoa le tupe fou o le a faaopoopo i lona tamaoaiga.
E lē fou nei ina ua tulai mai le faigamalo o loo iai nei, le talanoaina o lenei mataupu, auā na amata faatalanoa mai lava a o tulai mai le faigamalo ua mavae atu, ma na agai foi latou ma le Palemia i lena vaitaimi, o nisi o minisita ma faauluuluga o matagaluega, ma latou o ai i Hong Kong se’i feiloai ma kamupani nei ma faatalanoa le mataupu lea, ma na foi mai ma le ioega e lelei, peitai na saunoa Laauli e iai foi isi milomiloga na agai mai tua, ma i’u ai ina lē faataunuuina e oo mai lava i le taimi nei.
Ae ina ua tulai mai le faigamalo ua iai nei, sa ia toe ave ai loa i totonu le mataupu mo le toe faatalanoaina, ae na mautinoa lava le saunoaga a le alii minisita, e lei sainia se feagaiga e faapea ai ua amata aloaia nei faiga pisinisi, ona o lea lava e faatalatalanoa atili ina ia manino lelei le malo i vaega uma ma aiaiga aemaise ia iai ni tulafono ma taiala faaletulafono e faatonutonu ai nei mea uma.
Ae o le ta’ua ai o ata o le afioga i le Minisita o Tupe ma le afioga i le Minisita o Faatoaga e faapea o loo pueina mai ai i se sainiga feagaiga ua faia ma aumai ai ni faasalalauga i nisi o tala, e talitonu le alii minisita, o ni faasalalauga lē moni ma e lei iai foi o ia i Hong Kong i le taimi tonu lea sa iai le Minisita o Tupe iina.
