Ua sau i lalo le tau o loo totogi e tagata Niu Sila e nonofo ai tagata ua leai ni fale mo sina taimi puupuu, peitai e lē taugofie o lea lava e silia ma le $300 miliona i le tausaga o loo faaalu ai.
I le va o le 2018 sau i le 2022, e $1.48 piliona tupe totogiina atu e le matagaluega a le Social Development mo emergency housing grants, ma o se maualuga tele na faamauina i le va o tausaga nei lea sa na o le $52.42 miliona i le 2018 ae sau i le 2022 ua $374.17 miliona.
O tupe nei o loo totogi sa’o atu e le matagaluega agai i pulega o fale e aofia ai ma faletalimalo o loo faaaogā faakonekarate i lalo o emergency housing, ma i totonu o le tausaga lenei seia oo mai ia Setema na faaalu ai le $254.93 miliona.
Mai le sui o le pulega a le matagaluega o tagata na fesoasoani iai e totogi fale mo sina taimi lē tumau o i latou nei ua leai ni fale e o iai faapea ai ma aiga ma o le toatele lava o loo tuuina atu i motels e nonofo ai mo le vaiaso ma e ono faaopoopo le umi e fua lava i tagata taitoatasi ma mea o loo ui ai.
O le faletalimalo a Anglesea Motel i Hamilton ma le Mcentral Apartments i Manukau fale o loo maualuluga ai lava miliona o loo totogi atu iai, lea e silia ma le ta’i $25,000 ma ua atagia ai foi o Aukilani ma Waikato lea o loo maualuluga ai lava le fuainumera o tagata e nonofo i Emergency Housing.
