E iai se faaitu poo se pitonuu i Sini e le o fiafia i se manatu faaalia o le tatalaina lea o le faleaiga o le McDonalds i lea faaitu mo le 24 itula.
Ua lipotia ua faia nei se talosaga a le faleaiga e fausia se latou lala fou i Marrickville e pei ona faamaonia e se tasi o a latou sooupu.
Fai mai a ia o soo se faleaiga o le McDonalds i nofoaga uma o le atunuu e naunau e lagolago le komiuniti o loo iai le pisinisi e ala i le ofoina o avanoa faigaluega, faia o aoaoga mo le faatinoina o galuega aemaise le inivesi ai i tulaga tau tupe.
Sa faailoa i le lipoti o loo iai se faatatau mo se folasaga mo le faia o se faleaiga fogafalelua ma se kapaka faapea foi ma le drive thru e lata i le ogatotonu o Marrickville.
O se fuafuaga e le o taliaina lelei e tagata uma i lea faaitu ma faailoa ai foi finagalo o nisi e le o manaomia sea ituaiga faleaiga i o latou vaipanoa.
E silia ma le 300 faleaiga o le McDonalds i vaega eseese o Niu Sa Uelese.
