E lē o popole tele le minisita o leoleo i le faatauanau mai o Ausetalia i leoleo Niu Sila, peitai mai le iuni e tatau ona faaeteete.

O lea ua faalauiloa se tasi o polokalame a Kuiniselani o loo polomisi mai i leoleo Niu Sila e le gata e maualuluga totogi pe a o atu i Ausetalia e faigaluega ai, ae o le a maua foi le tupe e tapena atu ai.

$98,000 le totogi amata lea o loo sau i le faasalalauga o loo lomia i luga o nusipepa, e tusa lea e $23,000 e sili atu ai na i lo le totogi o le leoleo o loo maua i Niu Sila.

E le gata i lea ae o le a maua foi le $20,000 e faatapena atu ai e nofo i Ausetalia.

Fai mai Ginny Andersen, e le o popole ai.

Ae mai le sui o le iuni faapea ai le peresetene o le asosi o leoleo Chris Cahill, e tatau i le minisita ona faaeteete ona a toe tepa i nai masina ua alu, e faitau selau leoleo Niu Sila ua o.

O le lelei foi o totogi ua faailoa mai o se tosina tele lea i leoleo laiti, ma le isi a faaopoopo nei iai ma totogi ovataimi ua atili ai ona faigata ona e le totogia ni ovataimi o leoleo i Niu Sila.

O se manatu o le Palemia, Chris Hipkins e foliga mai o loo mafanafana foi ia o loo lelei totogi o leoleo Niu Sila.