O le vaiaso nei e toe sii ai penefiti ina ia faafetaia’i ma le alu i luga o le tau o oloa, peitai e le faapea e lava mo tagata uma.
O le tali manino lea a le Sui palemia o le minisita foi o le Social Development, Carmel Sepuloni i le la faatalanoga ma Jack Tame ananafi.
I le fesiligia ai o le Sui palemia poo lava le sii o penefiti mo aiga uma, o le tali manino a Sepuloni e fua lava foi i le tagata ma le tulaga o iai, e le gata o aitalafu totogi, tau o fale, nofoaga o loo nofo ai ma isi lava itu.
I le talanoa ai i penefiti e tusa ma le 50,000 tagata faaopoopo i le lisi o tagata o loo talaina penefiti ua ta’ua o Jobseeker Support poo penefiti nei e tala a o loo faatali se avanoa faigaluega, ae le faitaulia ai nisi e maua i ma’i o le tino.
O le aso muamua o Aperila e sii ai penefiti faapea tupe o penisione.
