E le o faigofie le nofo ma faitau aso o totoe ta le Kerisimasi, ae o loo faatali lava foi se tali o talosaga o visa tafao.
A o toe 12 aso oo i le Kerisimasi ua lipotia le lē mautonu o nisi o aiga ona o lea lava e lei maua mai se tali a le Immigration i visa tafao na faatalosaga.
O le tolu vaiaso talu ai na faailoa mai ai e le Immigration e tusa ma le 34,000 talosaga o visa tafao o loo faatali le iloiloina, ae toeititi 80,000 visa ua uma ona iloilo talu mai Aokuso.
O loo ioe le Immigration e moni ua tuai ona faagaioi visa ma o lea o loo ave le faamuamua i talosaga na tauaoo ia Aokuso ma Setema.
Tautino ai foi le Immigration o loo galulue malosi le aufaigaluega i le tau faagaioia o le tele naua o talosaga.
O nisi ua leva ona faatali talosaga o lea na oo lava i le Aotea Square i Aukilani ma faaleo faalauaitele ai lo latou manaoaga o le a fia mafuta ma matua o loo i atunuu mamao.
O le masina talu ai lea foi na sau ai tala e oo atu i le tolu masina o le a lotea ai le silia ma le 3,000 talosaga ona o le faaletonu o le system.
