Na tuufeanu se tasi o tamaitiiti aoga Palmerston North ananafi i vae o le taitai o le ACT, David Seymour a o ia asia ai le laumua.
A o sauni ai Seymour e tuumuli o lea na saunia e fanau aoga o le Freyberg High School le haka e faamavae ai, ma i ata ua salalau nei o loo iloa ai le tuufeanu iai o le tamaitiiti aoga i ona vae a o tu ma matamata i le haka.
Ae fai mai Seymour, e na te lē o amanaia tele ma e lē o vaai foi iai i se itu lē lelei, pau lana tala na fai mai, masalo o le ova o le fiafia i le taimi o le haka.
O loo maua foi i ata video na tapue, o lea na vave ane faiaoga ma tutu i le va o fanau o loo faia le haka ma le itu o loo tutulai ai Seymour ma nisi o le vasega o faiaoga faapea le pule aoga.
