E oo mai i le taeao nei e le o iai se suiga i tetee a faiaoga o aoga maualuluga lea ua mae’a faatulaga e amata i le Aso Gafua o le vaiaso a sau.
O lea lava e lei maua se maliega i le va o le Post Primary Teachers Association ma le malo e faatatau i totogi ma o ananafi lea ua fai mai ai o le a faatautaia e le Employment Relations Authority talanoaga i le va o itu nei e lua.
I lipoti a le asosi e na o le tasi lava le ofo a le malo ua tuuina mai i totonu o le 11 masina o talanoaga ma o le iai o se itu tutoatasi i totonu o fonotaga e talitonu o le a fesoasoani tele lea.
A o tu ai le Employment Relations Authority i le va o itu e lua, e le o suia ai tetee ua mae’a faatulaga lea o le a lē toe fono ai faiaoga o aoga maualuluga i tua atu o itula aoga amata mai le vaiaso fou seia oo lava i solo tetee lea o le a tofusia ai lava le pitonuu ma le aso e savavali ai a latou faiaoga.
A o lē maluelue ai la le faaiuga a faiaoga e faia pea tetee, o loo iai foi lo latou faamoemoega ia avea le iai o le Employment Relations Authority ma auala ia maua ai se tali mo i latou aemaise ia vave ia ona oo mai.
