O le mau lea a le sui o Aleipata Itupa i Luga le Afioga Fuaava Suluimalo Amataga i le Palemene ananafi e faatatau i tali a le malo ma finagalo faaalia i le lipoti a le Matagaluega o Faamasinoga lea sa lauliliu e le Komiti ma tuuina mai ai a latou fautuaga i le Palemene.
O loo manino i le fautuaga a le Komiti le tulaga manaomia o le faalelei o le faagasologa poo le process, atoa ai ma le tulaga o le tatau ona siitia le tuuina atu o Savali i tua mo le malamalamaga i le galuega faatino a le Matagaluega.
Sa faamamafa le saunoaga a le sui ma ia ta’ua ai le lē lava o le malamalamaaga o lo tatou atunuu i faatulagaga eseese o loo faatino e le Matagaluega, ma o le ala foi lea e mafua ai ona tumutumu le faamasinoga.
Sa ta’ua e le sui le tulaga o loo iai nisi o mataupu e pei o le toe taumafai o le aufaigaluega e faamalie nisi o aiga e lei faamanuiaina i se faamasinoga ae o loo ua mae’a iai le faaiuga a le Faamasinoga o Fanua ma Suafa i se mataupu.
Ua lē vaai ai i le Tulafono ma le faaiuga ae ua faia ona o le alofa o le aufaigaluega i se tagata ona o le faatauanau.
Ua mae’a tali le malo i lea tulaga ina ia faatino aoaoga mo le aufaigaluega ia siitia ai le tomai ma le agavaa o le aufaigaluega i faiga faavae o loo limataitaiina ai galuega e tusa ai ma le Tulafono ma faaiuga ua iai.
Sa ta’ua e le sui faipule a manino ma savavali i ala o le Tulafono o le filemu foi lea i nuu ma aiga.
Saunoa le sui faipule e lē faatauagavale i le aufaigaluega peitai o tulaga ia o loo iai i le faagasologa lea e mafua ai ona limataitaiina sese ai ē o loo gasolo atu i le Faamasinoga ma faatauanau le aufaigaluega ua mafua ai ona taatia le Tulafono ae ua ese le tulaga ua faia.
E lē o toe po se lilo i le amataga o le tausaga na alia’e mai ai se tasi o mataupu i le Faamasinoga ua mafua ai ona tusi faaseā atu ai se tasi o aiga i le Minisita o Faamasinoga faapea le Peresitene.
O le mafuaaga o le fanua o sea aiga ua mae’a faamauina le pule peitai ua manatu le Afioaga o le fanua e o latou sa tuuina atu ma o loo manaomia auā le faia ai o se falemai faaitumalo.
O le tulaga na iai sa faatonuina e le Sui Resitara o le Faamasinoga o Fanua ma Suafa ina ua agai atu mo le soalaupulega, ina ia toe faamasino itu faamasinoga ma le aiga lea ae ua taatia le faaiuga mausali a le Faamasinoga o Fanua ma Suafa sa faia i le tausaga 2021.
O itu faamasinoga o loo finau atu o itu lava foi ia sa finauina le mataupu i le faamasinoga muamua lea na maua ai le faaiuga mausali peitai ua lē amanaia e le sui resitara le faaiuga a le Faamasinoga ae ua vaai i lo latou va lelei ma le afioaga ma isi itu.
O loo tālia ai nei e lea aiga pe o le ā le tulaga o le a oo iai la latou mataupu.
Ae o itu e ogaoga ai, o le talepe lava e le tagata faigaluega o le faamasinoga o le faaiuga mausali a le Faamasinoga o Fanua ma Suafa o se tulaga ua avea ma Tulafono ua faamauina ai le pule o le fanua.
O se tasi foi o mataupu o le taofiga e le Sa’o o se tasi aiga o le tanuina o le tino maliu i lo latou fanua ma tuuina atu ai le poloaiga a le Resitara peitai e agai atu leoleo e faatino la latou galuega ae vili atu le avetaavale o le ofisa o Faamasinoga e iai lona sootaga i lea aiga ma se tasi sui resitara ma toe faafoi mai leoleo mai le faatinoga o la latou galuega.
O se tulaga o loo taatia ai nei se faaseā i le ofisa o le Minisita ma le Peresitene o le Faamasinoga o Fanua ma Suafa e lei maua lava iai se tali.
