O loo faaalia le agaga faafetai o le toatele o le mamalu o le atunuu i luga o fesootaiga televavave le facebook, i se tasi o alii leoleo sa pueina mamao atu e se tasi se ata, a o ia fesoasoani atu i se tina matua e tau faasagatonu lona nofoa faataavalevale poo le wheelchair, i luga o le auala savali, e aveese mai ai le aualatele o feoaiga pisi a taavale i le taulaga i Apia. 

Ua maitauina ai le tuuina atu i luga o le facebook upu faamalo ma le faafetai a tagata lautele ona o le galuega alofa na faatino e lenei alii leoleo i sia tina. 

E lē o se taimi muamua lenei ua vaaia ai le faatino o ni gaioiga alofa a sui o le Matagaluega o Leoleo mo le mamalu o le atunuu. 

Ma o se mitamitaga i nisi o tagata lautele lo latou molimauina o le tautua lelei lenei a nisi sui o le Matagaluega, aemaise lava foi i lenei vaitau o le eseese o finagalo o le atunuu e peiseai ua fesiligia ai le lelei faatino o galuega a le Matagaluega ona o mea o loo tutupu mai i le atunuu. 

O le vaiaso na tea nei foi sa molimauina ai le toatele o tagata na faaalia lo latou mitamitaga i le alii leoleo o le vaega o taavale afi (Traffic Enforcement Unit) ina ua ia taofia taavale ma tu faamalo ma fā’alo a o sisi ae le tagavai o le saolotoga o Samoa e fanauiti o le aoga a le Manumalo Baptist School i Vaisigano. 

O le itu na mata’ina ai lenei vaaiga, ona o le faia o lenei gaioiga a le malu o le malo a o totō ai timuga o lea taeao.  

 Na maitauina le momoli o alofaaga ma le faamalo a tagata lautele i nei sui o le matagaluega.