Tapunia malae vaalele i Brussels ma Liege i Belgium ina ua vaaia ai foi le feoa’i ane o drones na i’u ina toe tasui ai ālavaa o nisi o vaalele ma poloka ai le tuuvaa ese atu o isi vaalele.
O lipoti lata mai a le CNN ua ta’ua ai lea tulaga ma faailoa ai e le sooupu mai malae vaalele ua aafia, na vaaia se drone e lata i le malae vaalele i Brussels ma tapunia ai loa lea nofoaga ona o tulaga lava e ao ona mulimulita’ia tulafono i tulaga faapea e ono lamatia ai le saogalemu o tagata.
Fai mai na toe tatala i le lua itula mulimuli ane auā o se tasi lea o malae vaalele aupito pisi i le atunuu, ae na toe tapunia foi ina ua toe vaaia nisi drones ma e lē o mailoa i le taimi nei se taimi e toe tatala ai a o faatalia su’esu’ega.
O se tasi lenei o matāupu ua faaauau pea ona alia’e mai i lea faaitu o le lalolagi lea foi na tapunia ai le malae vaalele i Copenhagen ma Oslo i le masina o Setema ma e foliga mai o loo faaauau pea.
O loo ta’ua i le lipoti o loo masalomia e nisi Lusia o latou o loo faatinoina ia tulaga.
Puna o Faamatalaga: https://edition.cnn.com/2025/11/04/europe/drones-close-brussels-liege-airports-latam-intl
