Ua aveesea uma nei sā sā o le Koviti a Niu Sila.

O le tasi le minute e te’a ai le 12 i le vaveao analeila na aloaia ai le faaiuga a le Kapeneta mai fonotagata i le afiafi ananafi.

Talu mai Setema o le tausaga talu ai sa totoe ai na o le faanofoesea o le tagata ua faamaonia ua maua i le Koviti mo le 7 aso, atoa ai ma le faatonuga e tatau ona faia ufi fofoga i taimi e asia ai falemai.

Peitai mai le Palemia Chris Hipkins, ua ioe le Kapeneta o le a lē toe iai ni sā o le Koviti ma na fua lea i le faaauau pea ona sau i lalo o le fuainumera o cases faamaonia, o suesuega e faaaogā ai vai leaga mai otaota aemaise ai o le fuainumera o tagata taofia i le falemai.

Ae mai le minisita o le soifua maloloina Dr Ayesha Verrall e ui e lē o faamalosia, ae o loo iai lava taiala a le soifua maloloina e tatau ona nofo i le fale mo le 5 aso pe a lē malosi po ua faamaonia foi le aafia i le Koviti.

E sau le faaiuga a le Kapeneta i le afiafi ananafi e lei leva ona lipotia mai e le matagaluega a le soifua maloloina cases faamaonia ua lipotia i totonu o Niu Sila i le vaiaso talu ai, lea e 5,372 ma le isi 20 o tagata maliliu faaopoopo e fesootai ma le vairusi.