O le nofoaga o loo tausia ai nisi o tina ma tamā matutua o le atunuu i Mapuifagalele e faalagolago tele i le aaomafola ma le limafoai o tagata, kamupani ma pisinisi a o nisi taimi e maua le fesoasoani mai le Malo.
O le Kerisimasi o lumanai nei ua avea ma taulaiga o le faamoemoe o se sailiga meaalofa tupe mo lea nofoaga ma le nofoaga o Taupou Sa Monike i Vailima.
Ua faailoa i se pepa o faamatalaga faalauaitele le tapena ai nei o se koneseti o pesepega o le Kerisimasi mo Mapuifagalele ma le nofoaga o Tamaitai Sa Monike i Vailima o le a faia i le taulaga faatau o Otara i le Aso Toonai o le vaiaso asau ma ua 3 ai nei tausaga o faia lea faamoemoe tāua.
E 6 afe se seleni na maua i le taumafaiga muamua 20 afe na maia i le tausaga lona lua, ae 50 afe na tuuina atu mo ia nofoaga e lua i le tausaga na tea nei.
O le tasi o taumafaiga o lenei faamoemoe e pei ona faailoa mai, o pepa ua ta’ua o pledge forms e maua i nofoaga o le kamupani o le Pacific Ezy i Niu Sila ma Samoa e tusia ai foai tupe ma o seleni uma mai ia pepa faatumu o foai ma le koneseti o le a tuuina atu i Mapuifagalele ma le nofoaga o Tamaitai Sa Monike i Samoa ma le atunuu o Tonga.
O le mafutaga a le vasega o le tausaga e 1988 a le Kolisi o Sagato Iosefo, o le KaakiaMai Group ma uso Malisi o loo taulamua i le tapenaina o lea faamoemoe.
