O se tasi o matati’a ua faamauina i le faiga paaga a le Malo o Samoa ma le Malo o Amerika, o le tauaao atu lea e le sui o lea Malo i le Minisita o le soifua maloloina, o le galuega tele o le faaopoopoga o potu o le falemai i Faleolo, lea na muai fausia i se foai a lea Malo i le tusa ai nei ma le sefulu tausaga talu ai.
O le mae’a fausia o le faaopoopoga o lea falemai ua avea ai nei Faleolo Health Center ma se tasi o falemai faaitumalo, o le a tatala faasoloatoa i aso o le vaiaso mo le agai iai o le atunuu mo sailiga o fofo ma togafiti auā gasegase eseese.
E silia i le miliona tala na fausia ai lea faaopoopoga, ae e miliona tala Amerika foi na fausia ai le falemai i le amataga o lea foai a le malo tele o Amerika na umusa ia Novema o le tausaga e 2013.
O le Minisita o le soifua maloloina le afioga Valasi Luapitofanua Toogamaga Tafito Selesele ma le Amepasa o Amerika mo Samoa le susuga Thomas Undall na la ooti faatasi le lipine e aloaia ai le tatalaina o le galuega.
O se galuega o le a avea nei ma se tasi o sulufaiga o gasegase ma tagata e aafia i ni faalavelave e tutupu i lea vaega o le motu o Upolu aemaise e tu lata i le uafu i Mulifanua mo nisi mai Savaii e fia maua se laveai i ma’i o le tino ma ni faalavelave faafuasei.
