O le toe foi i Amerika Samoa o le vaaafi a se alii faipisinisi i le teritori na sau ma se uta mo se faalavelave o se maliu o le aiga o le faipisinisi i Savaii, ua ave iai ma le lapata’iga a le vaega o femalaga’iga i le Matagaluega a le Palemia ma le Kapeneta.
O le saunoaga mai lea i le Komesina o leoleo le susuga Auapaau Logoitino Filipo, ina ua tāpā sona finagalo e tusa o le sau o le vaa e aunoa ma se isi o auaunaga a le malo e fitoitonu ma ia tulaga na silafia.
Na faaalia e le Komesina o leoleo na mafua ona maua e le latou matagaluega le vaa ona o nisi sa i luga o le uafu i Salelologa na latou molimauina le taunuu o le vaa ma le la’uina ese o le uta.
E leai se moliaga ua faia e leoleo ae ua faailoa e Auapaau o loo faaauau a latou suesuega i ni faamatalaga ua oo atu ua ta’ua ai, e masani ona sau le vaa o lea tagata faipisinisi.
Ua faailoa foi e le Komesina i se faatalanoaga i le telefoni anapo, o le tala atu a le vaega o femalaga’iga a le tatou Malo, o le vaa ua ave iai le pemita e mafai ai ona malaga mai, ma o se cruising permit.
O le faanoanoaga o le ofisa o femalaga’iga a Samoa e pei ona latou faailoa i le Komesina o leoleo, o le aiaiga o lea pemita a malaga mai ma taunuu i ogasami o Samoa Tutoatasi e tatau ona afe i le uafu autu i Apia e siaki uma ai pepa manaomia ma ni uta o oloa o aumai ai.
O se alii Fiti sa kapeteniina mai le vaa ma ni alii Samoa se toalua, ae o le aliali mai o lea tulaga ua faailoa ai e le Komesina ua toe silasila nei i aiaiga o tulafono i le puipuia o tuaoi i le va o Samoa ma Amerika Samoa i nisi gaioiga faapea e toe tulai mai.
O le feaveaiina o laau malosi e lē faatagaina ona aumai i Samoa faapea pauta ma fualaau faasāina, o nisi ia o vaega na faaalia e Auapaau o loo iai popolega i ni tulaga faapea e toe aliali mai.
