O le Oranga Tamaliki – le Matagaluega o tamaiti – ua avatu nei iai se faaaliga tusitusia a le Komesina o Sulufaiga (Chief Ombudsman) e pei ona ia luitauina ai le faigamalo fou ina ia suia le matagaluega lea i se faatulagana e lei vaavaaia muamua ai.
O le Aso Lulu, sa kiliva ai e Peter Boshier se lipoti mana tele ma faamatuuina ai se tapaga mo faatinoga mo le malo e faia.
O le tamaititi laititi Malachi Subecz, sa lei lelei ona faia iai se tausiga a matagaluega a le malo.
O lea tamaititi e lima tausaga le matua, sa susunu, sasa ma fasiotia a o iai i le tausiga a se fafine, e ui lava ina sa lapataia e le aiga o Malachi se tulaga lamatia.
Sa lei faalogo le Matagaluega o Tamaiti i lea lapataiga.
Sa tautino e le ofisa o se mea sese, ae e oo mai lava i le taimi nei e lei faatoese lelei i le aiga.
Faaalia e Boshier, e tāua tele se faatoesega e atoatoa le lelei, e sau mai le loto, ma e ao ona faia i se auala e talia ai e le aiga.
O Boshier, ua iai matafaioi fou i lalo o suiga o le tulafono lata mai nei, ma ia faamatuuina ai i le Aso Lulu se lipoti mae’ae’a, ina ua mae’a ona tilotilo lona ofisa i le silia ma le 2000 o faitioga e uiga i lea matagaluega o fetaia’i ma faafitauli i le fā tausaga ua mavae.
O nisi o faalogona sa iai sa suesueina e le alii Ofisa Sili, o le ogaoga o le atu o mafaufau e aofia ai le taofia o tupulaga laiti e ui i lo latou mumusu mo le faitau tausaga.
O se tina talavou e iai aafiaga tumau sa aveesea lana pepe ina ua fanau, e lei toe faafoia ane lava iai, aemaise ai faamatalaga lē sa’o ma le faailogalanu e pei ona ofoina i le faamasinoga mo aiga.
E ui lava i le tele o fautuaga o suiga e faia, ae o le pule o le Matagaluega o Tamaiti, Chappie Te Kani, e lei iai i le taimi sa folasia ai lea lipoti, ae o le tamaitai sui ofisa sili Nicollette Dickson sa sui ai.
E ui lava i fautuaga a lea lipoti, ae o loo atoatoa lava ona ave le talitonuga o le tamaitai Minisita, Karen Chour [Shaw] i le pulega a lana matagaluega.
