O laau e tautau ane i luga o lona fanua ma poloka ai le susulu a le lā ma le vaaiga mai lona fale, o nisi ia o mafuaaga ua ave ai e se tasi tina mai Niu Sa Uelese, lona tuaoi i le faamasinoga.
O Lake Macquarie lea e tulai mai ai le mataupu lea i se fale e iai se vaega e share pe faaaogā faatasi ai ma isi tagata o loo faaaogāina le isi itu.
O Melanie Barstow na ia faatauina le fale lea i le 2019 ma e maualuga teisi ifo mai le fale o ona tuaoi, le Ainsworths lea na aumau i lo la fale talu mai le 1988.
E va fale e lua i se puipui sima ae o laau la o loo ola ai i le vaega tonu lea o loo faaseā ai Barstow i le punitia ai o le malamalama agai i le fale ma le popolega ina ne’i faaleagaina le puipui sima lea e aa o laau.
Na valaauina le mataupu i le faamasinoga ia Aperila ma e eseese finagalo faaalia o pati e lua i le mataupu ma o le lipoti lata mai ua ta’ua ai na faatonuina le Ainsworths e totogi se teulaau na te teuina laau ia i se maualuga talafeagai ae e manatu le faamasinoga e lē ono aafia le puipui sima i aa o laau ma e le o iai foi se aafiaga tele i le pupuniina o le malamalama mai le fale o le tina na tuuina atu le talosaga.
