O le Faamasinoga mo Tupulaga Talavou i le maota faamasino i Tuasivi i Savaii o le a toe valaau ai moliaga o se tamaitiiti e i lalo o le 16 tausaga le matua o loo tuua’ia i le gaioiga na faatama’ia ai ni vaafagota se lua sa taula i le uafu i Salelologa i Savaii.
Sa tula’i lē ua molia i le Faamasinoga Maualuga i le Aso Gafua o le vaiaso nei peitai ua lē tuuina atu sana tali ae toe tapena loia a leoleo e ave le mataupu e valaau i le Faamasinoga mo Tupulaga ona e laitiiti tausaga o le tamaitiiti o le a lē faailoaina lona igoa ona o puipuiga o fanauiti o loo aiaia i ta’iala o galuega a le aufaasalalau ma tusitala.
O loo a’oga lē ua molia i le tulagalua a lo latou nuu ma ua fautuaina e le faamasinoga e faaauau pea ona alu i le a’oga e faatali ai le aso 19 o le masina fou o Mati.
O le a lē toe valaauina lona faamasinoga i Mulinuu ae valaau i Tuasivi i Savaii.
O loo tatala o ia i tua i le aiaiga e saini i le ofisa o leoleo i Aso Gafua o vaiaso taitasi.
O le tuaa tamā o lona tinā sa tula’i i le faamasinoga e faailoa le matua o le tamaitiiti ona na te le’i iloa ina ua fesili iai le faamasino le afioga Fepuleai Ameperosa Roma.
