Ua folasia i le palemene le mataupu i faamavaega a sui faipule e toatolu o itumalo faapalota o Vaa o Fonoti, Siumu ma Faleata 4, ma ua faamausali ai ma latou tali tetee i moliaga ua faia e le Fofoga Fetalai, ma ua faapena ona tuuina atu loa i le Faamasinoga mo se iloiloga ma aumai ai se faaiuga.

O le faaiuga lea e iloa ai pe o le a faagafua pe avanoa loa nofoa o ia itumalo ae toe faia ni palota laiti, poo se isi faaiuga i le afaina o aiātatau o ia faipule mai le fia avea ma sui tutoatasi, ae ua le faamavae ona o le fia lagolago i se pati faaupufai e tusa o aiaiga o le tulafono o faigapalota.

Na mautu lea tulaga ina ua mae’a faailoa e le Fofoga Fetalai faamavaega mai le pati e puipuia aiātatau a le tofa Mau’u Siaosi Pu’epu’emai, le tofa Tuu’u Anasii Leota, ma le tofa Ale Vena Ale.

Na maua foi avanoa oi latou e saunoa ai ma faailoa a latou tali tetee i moliaga peitai, sa faaoioi le sui taitai o le Itu agai i le Fofoga Fetalai e fautuaina le faipule o Siumu e tali i lona moliaga, ae le o le afea o mafuaaga ua faamavae ai ma le vaega e puipuia aiātatau a tagata sa avea ai ma sui auai.

O se vaega lenei o le saunoaga a le tofa Tuu’u Anasii Leota na mafua ai ona siisii lona finagalo ina ua faauilavea le sui taitai o le Itu agai o le sui taitai foi o le vaega e puipuia aiātatau a tagata sa avea ai ma sui auai.

Se vaega o taualumaga a le fono aoao ina ua faaalia finagalo o sui faipule e toatolu ua molia i aiaiga o tulafono tumau ma le tulafono o faigapalota ina ua faamavae mai le vaega faaupufai sa lagolago ma avea ai ma sui o le faafaletui o faipule o le HRPP.