O loo i Iceland nisi o loo galulue i le Matagaluega o Faigafaiva a le atunuu ma nisi o sui mai atunuu o le Pasefika e tapue tomai ma agavaa o lenei atunuu i le siitia lea o tulaga o auaunaga tau faigafaiva.
O loo faamauina i se pepa o faamatalaga mai le faletupe a le lalolagi le World Bank o lenei faamoemoe o loo faatinoina vaavaalua ai le faletupe ma le Malo o Iceland e tuuina ai le avanoa i sui o le Pasefika ina ia maimoa ma maitauina le tulaga o le gasologa o le atinae tau faigafaiva i lenei atunuu mo le faaauauina mo le lumanai.
O vaega o lenei asiasiga e aofia ai nisi o suiga fou faatekonolosi mo atinae faaauau i faigafaiva aemaise o vaega eseese o loo faaaogāna mo le agai i luma o nei taumafaiga.
E ui i le va va mamao o le Pasefika ma lenei atunuu aemaise ai o le tulaga i le faitau aofai o ona tagatanuu ae iai lava nisi e tutusa ai i le itu tau faigafaiva.
O loo mata’ituina lelei le tulaga o le gataifale e tauala mai i le faaaogāina o auala faasaienisi e pulea ai le tele o figota e tusa lona tau e auina atu ai i fafo ma le $2.5 piliona ma e 70 pasene o loo gaosia ai oloa e faatauina atu i fafo.
