Ausia e le Toa Samoa le Semi Finals mo le Ipu o le lalolagi a le Lakapi Liki

O se taaloga na tuufesili poo ai o le a manumalo ona o le tau fai malolosi o ‘au uma e lua a le Toa Samoa ma le Mate Maa Tonga peitai e le’i tuumāmāina e le ‘au a le atunuu lenei taaloga taua ma o latou faatoilalo ai Tonga i ‘ai e 20 – 18.

O se taaloga ua faaigoa e le toatele o le taaloga autu o le ipu o le lalolagi le feiloai ai o ‘au malolosi ia e e lua a le Pasefika. I le ‘afa muamua na muai tau ‘ai le Toa Samoa ina ua laasia e Jaydn Su’a le laina sikoa. Tulai mai ‘ai e 6 Toa Samoa i le leai a Tonga ina ua manuia le a’a a le alii o Stephen Crichton i le pou.

E lei umi ae tali mai Mate Maa Tonga i lana ulua’i sikoa ae le’i ova le a’a i le pou ma tulai mai ai ‘ai i le 6 a le Toa Samoa ae 4 – MMT. Ae lei mae’a le afa muamua na toe laasia e le Toa Samoa le laina sikoa tauala atu i le alii o Jarome Luai, manuia foi le kiki i le pou, Toa Samoa 12 – MMT – 4.

Na toe finau atu foi le ‘au a le MMT ma laasia ai le laina sikoa e le alii o Sio Siua Taukeiaho, manuia le taumafai atu i le pou ma maua ai ‘ai o le taaloga i le ‘afa muamua , Toa Samoa 12 – MMT – 10.

Na malosi le una’i a ‘au e lua i le ‘afa mulimuli ma na tau fai iai sala (penalty) faasaga ia Tonga ma Samoa ma maua ai le avanoa e faaopoopo ai isi ‘ai mo le Toa Samoa ma le MMT tulai mai ‘ai o le taaloga i le 14 Toa Samoa – MMT 12.

O le break through a le alii 19 tausaga ia Joseph Sualii ma le kiki a le alii o Anthony Milford na faatini ai e le alii malosi ia Brian Too ma maua ai le isi sikoa a le Toa Samoa. Sa manuia foi le a’a a Stephen Crichton I le pou ma atili telē ai le manumalo a le Toa i ‘ai e 20 – 12 MMT.

Na toe finau mai le ‘au a Tonga ma laasia e le alii o Sione Katoa le laina sikoa ma manuia foi le a’a i le pou na tula’i mai ai loa ‘ai Toa Samoa 20 – 18 MMT.

O nai minute faai’u o le taaloga sa molimauina le latalata o le ‘au a Tonga i le laina sikoa peitai na toe faatamala ma lusi ai loa le polo i le itu a le Toa Samoa. I sekone faai’u o le taaloga na matua’i u’u mau e Samoa le polo seia oo lava ina tatagi le faili ma mautinoa ai le sao atu o le ‘au a le atunuu i le Semi Finals mo le uluai taimi.

O le vaiaso fou o le a toe feiloai ai le Toa Samoa ma le ‘au mai Egelani e saili ai se avanoa mo le sailiga siamupini.