E to’afitu tagata lea ua pu’eina e leoleo mai se solo tetee na faia i fafo ane o se nofoaga i Sini, o le solo tetee e faia faasaga i le Indo Pacific International Maritime Expo lea na amata i le ‘afa o le 6 i le taeao i le Tumbalong Park i le Darling Harbour faafesaga’i ma le nofoaga o loo faia ai le faamoemoe i le aai o Sini.
Ta’ua e le 9News pe ā ma le 200 tagata na taunuu atu i le nofoaga lea i le ‘afa o le 7 i le taeao ma o le to’atele sa faalealea solo fu’a a Palesitina ma faailo.
O loo iai se vaega tele o leoleo ma ua ta’ua sa taumafai nisi o le ausolo tetee e sao i lalo o le kapaka o le nofoaga o loo faia ai le fonotaga ma o i lea na tapu’e ai e leoleo i latou e pei ona ta’ua.
Fai mai se tasi o le ‘au organisers o lea solo tetee, o latou o loo tetee filemu i le fonotaga o loo faia ma ua mae’a faamauina e Malo Aufaatasi le to’atele o tagata ua fasiotia i Gaza ma o le fonotaga lea o loo solia ai tulafono faavaomalo e faatatau i ‘au’upega.
O lea fonotaga o loo ua amata faagasolo i le asō aga’i i le aso 6 lona uiga o le Aso Faraile o le vaiaso nei lava.
O le fonotaga o loo aga’i i tulaga tau ‘au’upega mo le puipuiga ma o le autū o le tausaga nei Strength at Sea – Security and Prosperity at Home.
Puna o Faamatalaga: https://www.9news.com.au/national/protesters-gather-outside-indo-pacific-international-maritime-exposition-arms-expo-in-sydney/7258fff7-355b-4fa6-8bb5-be715fac8521
