Na matuai faateia le alii 31 tausaga o Dylan Alcott ina ua faamaonia o ia ua filifilia e le Malo e avea ma tagata Ausetalia o le tausaga, Australia of the Year 2022. O le alii siamupini ile tenisi ua avea nei ma uluai tagata e iai manaoga tumau ua mauaina lenei faailoga talu mai le 62 tausaga sa faataunuu ai lenei faamoemoe ile atunuu.
O le alii o Dylan ole a litaea mai le taaloga ile maea o le Australian Open o loo faagasolo, ae ua atoa le 23 o ana taaloga grand slams ua manumalo ai ma umia foi le pine auro mai taaloga Paralympic ma ole uluai alii ua manumaloina ia tulaga, Golden Slam I soo se taaloga tenisi.
Ae le na o le pau lea o le tulaga ua filifilia ai e avea ma tagata Ausetalia o le tausaga, o Dylan e lauiloa foi ile atunuu I lana galuega ole fesoasoani ai I tagata Ausetalia e iai manaoga tumau ma sa ia mauaina foi le Order of Australia ile 2009 I lana auaunaga I taaloga. O le 2017 sa faatuina ai le Dylan Alcott Foundation e maua ai avanoa sikolasipi mo tagata Ausetalia e iai manaoga tumau mae na te faatulaga music festivals mo le komiuniti.
Na ia faailoa ise faatalanoaga I luga o le televise ile taeao analeila o le a faaaoga le avanoa ua ia maua e finau atili ai mo ni avanoa ma ni faamanuaiga mo tagata e iai manaoga tumau I Ausetalia. Fai mai Dylan e fiafia ile avea o ia ma se tagata e iai manaoga tumau.
Faaopoopo atu ia Dylan e toatolu isi ua faamanuiaina foi. I le Senior Australian of the year ua mauaina e Val Dempsey 71 tausaga ona o lana auaunaga ua silia male 50 tausaga I le St John Ambulance o se volunteer, galue fua e aunoa ma se totogi.
O le Young Australian of the Year na mauaina e Dr Daniel Nour mo lana auaunaga I tagata e leai ni mea e nonofo ai, homeless, na ia amataina ai le Street Side Medics e fesoasoani ai i Niu Sau Uelese. Ole faailoga ole local hero ua mauaina e Shanna Whan mai Niu Sau Uelese foi mo lona sao ile suia ole auala e talanoa ai tagata ma komiuniti ile faaaogaina o le ava malosi. O le aso o loo faailogaina ai ile atunuu atoa lenei aso taua ile talafaasolopito o Ausetalia.
E silia ma le 16 afe tagata ua avea ma sitiseni o Ausetalia I sauniga eseese ile atunuu I le aso.
