O se tinā matua pe ā ma le 80 tausaga le matua o lona soifua, ma o se pasese i luga o se tasi o vaatele mo tafaoga, le cruise ship, na maua atu ua maliu i se motu i gataifale o Kuiniselani ae ua aga’i ese le vaa mai lea nofoaga.
Lipotia e le CNN o le vaa, Coral Adventure sa faagasolo ana faigāmalaga e 60 aso e taamilo ai ia Ausetalia ma o le tinā matua lea o se tasi o le pasese ma sa lipotia e le auvaa i le po o le Aso Toonai o loo misi ina ua faia siaki o le pasese.
O le taeao o le Aso Toonai sa taula ai le vaa i Lizard Island pe ā ma le 30km mai gataifale o Kuiniselani ma e iloa tele lea nofoaga i lona matagofie.
Faamaonia mai e leoleo na maua atu iai i’i le tino maliu o si tinā lea i le Aso Sa, ma o loo faamauina e lē o masalomia ai se tasi ae e lē o mailoa le taimi tonu na maliu ai.
O loo faagasolo i le taimi nei le su’esu’ega ae ua feta’ua’ina e fai si taugatā o le tafaoga lea e oo i le 80 afe Ausetalia lona tau.
Puna o Faamatalaga: https://edition.cnn.com/2025/10/29/australia/australia-cruise-passenger-lizard-island-intl-hnk
