E 15 sui mai le Pasefika sa faimalaga atu e auai i se polokalame i le Malo tele o Amerika le U.S. Trade and Developing Agency.

O le aumalaga e aofia ai le Pule Sili o le Matagaluega o Tiute ma Tupe Maua, Afioga Fonoti Talaitupu Lia Taefu, Pule Sili Lagolago a le Matagaluega o Galuega Tetele a le Malo, Vaelua Sonny Brown ma le sui mai le Pulega o Uafu ma Vaa a Samoa La’ifai Failautusi Tiotio.

O le auga o lenei polokalame ina ia silasila i vaega e faamalosia ai le atinaeina o uafu aemaise o itu e puipuia ai tulaga o uafu mai suiga o le tau i atunuu e lima i le Pasefika e aofia ai ma Samoa e pei ona faamauina i se pepa o faamatalaga.

O nisi o vaega o le atunuu na malaga ai lenei polokalame e aofia ai Baltimore, Houston ma Uosigitone ma feiloai ai ma nisi o kamupani i totonu o le Malo tele e talanoaina ai avanoa aemaise o faatinoga ma gaioiga e atinae ai le faaleleia ma le galueaina o uafu ma asia ai uafu i nisi o vaega o le atunuu.

O le faamoemoega o lenei polokalame ina ia faasoaina famatalaga e ala i tekonolosi faaonaponei aemaise o galuega ma avanoa e siitia ai le tulaga o uafu i lona saogalemu.

O le faamamafa o se tasi o vaega i le tulaga o puipuiga ma nisi o auala e saogalemu ai mai suiga o le tau e pei ona aafia ai le Pasefika i suiga maaleale o le tau aemaise o le siisii pea o le suasami.