O le aso ananafi lea na faia ai se sainigalima a le Malo o Samoa ma le kamupani a le Samsung o se faigapaaga e pei ona faimalaga mai ai i le atunuu.
O lenei faamoemoe ua avea ai Samoa ma isi atunuu e 55 i le lalolagi ua fesoasoani ai le kamupani lenei i lalo o sana polokalame na faavaeina mai i le 2010 ua ta’ua o le Samsung Solve for tomorrow.
E pei ona maua i faasalalauga mai le ofisa a le Sooupu a le Malo e agai tonu lenei fesoasoani i le vaega o aoaoga.
Na saunoa ai le Minisita o Aoga Taaloga ma Aganuu, Seuula Ioane Tuaau, “O se fiafiaga tele lenei mo Samoa aemaise i le vaega o Aoga mo le avanoa e auai ai i le polokalame lenei e patino i fanau e i le vaega o Kolisi Maualuluga o fesoasoani ina ia faalauiloa ai le aogā o auala faatekonolosi i aoaoga a le fanau.
“O lenei foi polokalame tāua e fesoasoani lea i le faaleleia atili o le itu tau aoaoga a alo ma fanau i Kolisi e pei ona maitauina i aso nei le maualuga o le tulaga o le malamalama o fanau i soo se auala faatekonolosi.”
O lenei sainigalima oloo aumaia ai vaega e agai ai lenei polokalame e faalauaitele ai le malamalama male tomai ele gata i fanau aoga ao faiaoga i mataupu e aofia ai le Saienisi, faainisinia, itu tau tekonolosi male Matematika.
