O le silasila mamao a le malo o Samoa i atina’e e fesoota’i i le polokalame o nuu ma aiga manuia o loo faafoe e le Matāgaluega o Tinā ma Tama’ita’i, Atina’e o Afio’aga ma Agafesoota’i, ua tāua ai le auai o le usugafono a Samoa i le fono tele a le lalolagi o loo faatalanoa ai auala ma taumafaiga e siitia ai le atina’e o tagata ma foia ai le ola mativa.
O se faatasiga faavaomalo o loo usuia i le aai tele o Doha le laumua o le atunuu o Qatar o loo auai le Minisita o lea matāgaluega le afioga Moefaauouo Julius Ah Kui Tafunai ma le faauluuluga o lea matāgaluega.
O loo aofia ai foi i le usugafono ma sui o le malo o Samoa o loo galulue i Europa le afioga ia Fatuomoana Upolu III, Dr Pa’ō Luteru ma le afioga Toleafoa Nella Pepe Levy.
O le ulua’i fono faavaomalo lea ua auai le Minisita ua tauaveina nei le vaaia o le matāgaluega o tina ma tama’ita’i, atina’e o afio’aga ma agafesoota’i.
O le Aso Lua o lenei vaiaso na amatalia ai le fonotaga o loo auai le Minisita o lea matāgaluega ma lana usugafono.
