O le fonotaga lenei o loo usuia i Nadi Fiti ma o loo auai ai nisi o sui o faalapotopotoga o loo iai le fesootaiga ma mataupu tau i tamaitai.
O le faalapotopotoga a le Brown Girl Woke o loo auai ai i lenei fonotaga ma aoaoga mo le uluai taimi.
O lenei fonotaga o loo aofia ai nisi o vaega e faamalosia ai pea le tulaga i matafaioi ma pokalame a faalapotopotoga ma sosaiete o loo taulamua i le faalauiloa ma fesoasoani foi i mataupu e aofia ai tamaitai e pei o le soifua manuia lautele ma aiātatau.
O le sui a le faalapotopotoga, Doris Tulifau na ia faamatala ai vaega o loo galulue ai i le taimi nei e fesoasoani ai i tamaitai.
“O le auai ai i lenei foi faamoemoe se’i matou tilotilo ma mātau foi galuega o loo faia e le Pasefika e fesoasoani ai pe faalauiloa ai foi tamaitai.
“O loo faatino e le Brown Girl Woke se aoaoga i Samoa mo le tumamā o tamaitai e ala lea i taimi e faia ai o latou palapala masina poo menstrual periods se’i tulou.
“Ua matou aumai ai nisi latou te mafai ona fai reusable pads e aunoa ma se totogi mo tamaitai uma lava o Samoa.
“O lenei fesoasoani e mo alo tamaitai i aoga tulagalua, o kolisi, tamaitai o loo i le toese, i latou e iai manaoga faapitoa aemaise tamaitai o loo iai taleni i taaloga.
“O se auala lea e mafai ai ona faaleo le tāua o tamaitai ma o latou tino ma ia aua ne’i misi le aoga a le teine pe a iai tulaga faapea ona o le lē maua o se pad pe leai foi se tupe e faatau ai.”
Ta’ua e Tulifau e fiafia foi e faailoa o le a galulue soosootau’au ai ma le Samoa Family Health, o le laulau a tupulaga talavou i nisi foi o mataupu e pei o le maitaga o tamaitai talavou ma le STI.
O lenei fonotaga o loo faatautaia ma e faamae’aina i le faaiuga o le vaiaso nei.
