Toatele fanau aoga o le iunivesite a Massey faapea ma nisi o faiaoga ua faatalosagaina le tatau ona faamavae o le pule o le iunivesite.

O lea o loo faaauau pea le tetee faasaga I fuafuaga a le iunivesite lea ua fai mai ai e faaitiitia I le 30% lana aufaigaluega I le vaega o mataupu saienisi ma le tekonolosi.

E iai le fonotaga na faia ananafi ma o lea na maua ai le avanoa e faaleo atu ai finagalo o le toatele e le tatau ona alu le vaea ma ua tatau foi I le pule sili ia Jan Thomas ona faamavae mai.

O le finau a le toatele o fanau aoga faapea se vaega o faiaoga, o le a leai ai ma galuega a faiaoga ma pau le tulaga o aoaoga mo fanau pe a taunuu le isi vaea ua tau mai.

O lea ua tulalata I suega faaiu o lenei tausaga, ma e le o faavaivai ai le au tetee.

E oo mai I le taimi o tala fou e leai se faaiuga aloaia a le iunivesite e tusa ma talosaga ua folasia.