Ua iai le talitonuga o lea ua ono sao mai i totonu o Niu Sila le vairusi fou o le Koviti ua ta’ua o le BA.2.86.
O lapataiga nei mai tagata suesue faapitoa tau i le soifua maloloina i totonu o le atunuu, e ui o lea e foliga mai e lei maua i le taimi nei.
O le vairusi lenei o le BA.2.86 o loo faapopoleina ai sui o le soifua maloloina i Peretania e pei ona faamauina ai e 15% na alu ai i luga cases faamaonia o le Koviti i totonu i le vaiaso talu ai ma ua toe faamalosia ai le faia o tui.
E ese mai ia Peretania e faapea foi le tele o isi atunuu e pei ona amata maua ai lenei vairusi mai le faaiuga o Iulai, ma i lipoti o le BA.2.86 e lē gata e vave lona pipisi ae o le fanafanau.
Fai mai ai Michael Baker, o se popolega le malosi o le vairusi ae o lea e pei e lē o amanaia e le toatele o tagata Kiwi.
I le taimi nei ua toe augani mai ai fomai i tagata ia tautuana tuipuipui ma ese mai i taimi e aafia ai i le Koviti o lea foi ua toatele tagata ua maua i auga o le long-COVID.
