Ua tauuuu mai i fanua le Palemia o Fiti o Sitiveni Rabuka mo sana malaga asiasi e aofia ai ma nisi feutanaiga aloaia.
O le a iai le alii Palemia i Aukilani faapea foi ma Ueligitone ma o le a faia foi se fonotaga ma le Palemia o Niu Sila o Chris Hipkins, le minisita o le va i fafo Nanaia Mahuta ma le minisita o fesuiaiga o le tau James Shaw.
Saunoa Hipkins o le 1998 na muai asiasi mai ai Rabuka i sana malaga aloaia foi, e tusa ua silia ma le 25 tausaga talu ai ma e fiafia tele e toe faafeiloai atu i le alii Palemia.
Ta’ua e Hipkins o Fiti ma Niu Sila ua leva tele le la mafutaga e faavae i luga o le galulue faatasi.
Lipotia e ese mai i mataupu tau le puipuiga ma le saogalemu, o suiga o le tau le isi mataupu autu o le a faatalanoaina.
O le Aso Tofi o le vaiaso nei e toe taliu ai le alii Palemia ae ua fuafua o le a ia asia le Pukeahu National War Memorial Park ma o se malo faaaloalogia foi a le malo i le tele o nisi o fuafuaga tau le komiuniti ua faatulaga.
